Íslensk orkumiðlun og Klappir gera með sér samstarfssamning

Íslensk orkumiðlun og Klappir grænar lausnir hafa gert með sér samstarfssamning sem veitir viðskiptavinum þeirra möguleika á að nýta sér hugbúnað Klappa til að miðla raforku- og umhverfisupplýsingum í gegnum sérstakt stjórnborð raforku.

Hugbúnaðarlausnin byggist á stafrænni tækni Klappa en fyrirtækin tvö vinna í sameiningu að nánari útfærslu á raforkustjórnborðinu. Markmiðið með samstarfinu er að veita fyrirtækjum skilvirkt raforkustjórnborð til að fylgjast með raforkunotkun, draga úr rekstrarkostnaði, bæta auðlindanýtingu og minnka sóun.

„Við hlökkum mikið til vinna með Klöppum og hjálpa íslenskum fyrirtækjum að auka sjálfbærni í rekstri og draga úr neikvæðum umhverfisáhrifum með því að nýta betur raforku,“ segir Magnús Júlíusson, framkvæmdastjóri Íslenskrar orkumiðlunar.

„Við erum hæstánægð með að Íslensk orkumiðlun hafi valið að leita til okkar hjá Klöppum um hugbúnaðarlausn sem heldur utan um flesta þætti raforkunotkunar og sölu raforku. Þetta er spennandi og þarft verkefni sem fellur vel að starfsemi Klappa,“ segir Jón Ágúst Þorsteinsson, forstjóri Klappa grænna lausna.

Um Íslenska orkumiðlun:

Íslensk Orkumiðlun var stofnuð árið 2017 og fékk leyfi til að stunda raforkuviðskipti sama ár. Rafmagn sem Íslensk orkumiðlun selur kemur frá endurnýjanlegum orkugjöfum, annaðhvort vatnsafli eða jarðvarma.
Sjá frekar: iom.is

Um Klappir grænar lausnir:

Klappir grænar lausnir hf. er leiðandi í heiminum á sviði hugbúnaðarlausna í loftslags- og umhverfismálum. Lausnir og aðferðafræði Klappa fela í sér söfnun, vinnslu og miðlun umhverfisupplýsinga, þar sem mögulegt er að greina gögnin, setja upp töluleg markmið og fá heildstæða yfirsýn um mengandi starfsþætti.

27. nóvember, 2019

sverrir